Ике тапкыр индексациядән соң картлык буенча уртача пенсия күләме 2 834 сумга арткан
Соңгы ике индексациядән соң картлык буенча иминият пенсиясенең уртача күләме 2 834 сумга арткан. Бу хакта Россия Социаль фондының Татарстан бүлеге идарәчесе Эдуард Вафин ведомство коллегиясе утырышында хәбәр итте. Бу турыда «Татар-информ» хәбәрчесе Надежда Гордеева яза.
«Эшләмәүче пенсионерларның иминият пенсияләре узган елның гыйнварыннан 4,8 процентка индексацияләнде. Ә 2024 елның 1 гыйнварыннан – 7,5 процентка», – дип сөйләде докладчы.
Вафин билгеләп үткәнчә, узган ел 34 меңнән артык пенсия билгеләнгән. Шул ук вакытта инвалидлык буенча пенсия Медицина-социаль экспертиза бюросыннан инвалидлар реестрына кергән мәгълүматлар нигезендә гаризасыз билгеләнә.
Узган ел ахырына Бөек Ватан сугышы ветераннары һәм катнашучыларының уртача пенсия күләме 38,2 мең сумнан артык (хәрби имгәнү нәтиҗәсендә инвалидлар өчен), 49,7 мең сумнан артык (Бөек Ватан сугышында катнашучылар өчен) һәм 34,7 мең сумнан артык (һәлак булган хәрбиләрнең тол хатыннары өчен) тәшкил иткән.