Игорь Комаров Кабан күле буенда һәм Казанның төзекләндерелгән ишегалдында булачак
РФ Президентының Идел буе федераль округындагы вәкаләтле вәкиле бүген эш сәфәре белән Татарстан башкаласына килә.
(Казан, 23 июль, «Татар-информ», Марат Ишкильдин). Бүген РФ Президентының Идел буе федераль округындагы вәкаләтле вәкиле Игорь Комаров Татарстанга рәсми сәфәре барышында ТР Президенты Рөстәм Миңнеханов белән бергә Кабан күле буенда һәм Казанның «Безнең ишегалды» программасы буенча төзекләндерелгән ишегалдында булачак. Республика Президентының матбугат хезмәте җитәкчесе Лилия Галимова онлайн-брифингта шулай дип белдерде.
«Кунакның берничә объект белән танышуы, аңа Кабан күленең яр буен тәкъдим итү (проектны гамәлгә ашыруның хәзер нинди стадиядә булуы хакында бәян ителәчәк) һәм Президент программасы буенча төзекләндерелә торган ишегалларының берсендә булуы көтелә», - диде Галимова.
Иң элек Татарстан Президенты һәм вәкаләтле вәкил Кабан күле буенда алып барыла торган эшләргә бәя бирәчәк. Шуннан соң Бигичев һәм Глушко урамнарындагы уртак сквер белән берләштерелгән өч ишегалдын үз эченә алган территория белән танышачаклар. Бу территориядәге барлык йортлар 2000нче еллар башында төзелгән. Проект әлеге ишегалды территорияләрен үстерүне күздә тота.
РФ Президентының Идел буе федераль округындагы вәкаләтле вәкиле Татарстанга рәсми сәфәре барышында Горки-Әмәт урманында да булачак.