Игорь Комаров Идел буе округы Советы утырышында хәрбиләргә ярдәм турында сөйләде
Бүген Пермьдә Россия Президентының Идел буе федераль округындагы вәкаләтле вәкиле Игорь Комаров җитәкчелегендә Совет утырышы булды, дип хәбәр итә аның матбугат хезмәте. Утырышның төп темасы – махсус операциядә катнашучыларга һәм аларның гаиләләренә Идел буе округында күрсәтелә торган төп социаль ярдәм чаралары.
Чарада Совет әгъзалары, шул исәптән Идел буе федераль округындагы вәкаләтле вәкилнең урынбасарлары һәм Россия Эчке эшләр министрлыгының Территориаль органнар җитәкчеләре советы рәисе Юрий Арсентьев катнашты.
Утырыш алдыннан Игорь Комаров һәм Идел буе федераль округы төбәкләре губернаторлары Россия Герое Сергей Ефремов исемендәге «Время смыслов» плакат сәнгате күргәзмәсен карады. Сергей Ефремов 2025 елның февралендә Курск өлкәсен азат иткәндә һәлак булган.
Игорь Комаров сүзләренчә, округ төбәкләрендә махсус операция катнашучыларына күрсәтелә торган 200 ярдәм чарасы гамәлдә. Алар гамәлдәге хәрби хезмәткәрләргә һәм махсус операция ветераннарына эшкә урнашуда, үз эшләрен ачуда, медицина тернәкләндерүендә, юридик һәм психологик консультация алуда ярдәм итүгә юнәлдерелгән.
Шулай ук ул Владимир Путин куйган бурычлар нигезендә округта уздырыла торган нәтиҗәле эшне дә билгеләп үтте. Эш нәтиҗәләренең берсе – махсус операция ветераннарын иҗтимагый-сәяси тормышка актив җәлеп итү.
«Округтагы барлык төбәкләрдә дә «Геройлар вакыты» федераль программасына охшаш төбәк белем бирү программалары эшли. Финалга чыккан 1088 кеше ачыкланды, аларның 645е белем алачак, гамәлдәге 443 хәрби резервка кертелде. Күпчелек субъектларда белем бирү модульләре башланды инде. Округта махсус операция катнашучылары сәяси тормышта да актив катнаша. Әйтик, 2024 елда махсус операциянең 60 ветераны төрле дәрәҗәдәге закон чыгару һәм вәкиллекле органнарга сайланды», – диде Игорь Комаров.