Идел буе федераль округында бәяләр 7,9 процентка арткан
Идел буе федераль округында куллану бәяләренең агымдагы үсеше 2026 елның май-июль айларында сезонлылыкны исәпкә алып, елга 7,9 процент тәшкил иткән, дип аңлашыла Россия Банкы мәгълүматларыннан. Бу еллык инфляция түгел, ә агымдагы бәя арту күрсәткече.
Чагыштыру өчен, Үзәк федераль округта күрсәткеч 6,7 процент, Төньяк-Көнбатыш округында – 7,7 процент, Урал округында – 8,1 процент, Себер округында – 9,1 процент тәшкил иткән. Иң югары темплар Көньяк федераль округында теркәлгән – 13,1 процент һәм Төньяк Кавказ – 12,8 процент.
Россия буенча июльдә бәяләр июньдә 0,87 проценттан соң 0,54 процентка арткан. Шул ук вакытта агымдагы үсешкә бензин һәм дизель ягулыгының кыйммәтләнүе төп өлеш кертте. Шулай ук ит продуктларына һәм шикәргә бәяләр сизелерлек арткан. Яшелчә һәм җиләк-җимешләр, киресенчә, арзанайган, ләкин июль өчен гадәттәгедән көчсезрәк.
Россия Банкы билгеләп үткәнчә, ягулык бәясе үсеше транспорт чыгымнарын арттыру аша башка товарларга һәм хезмәтләргә тарала башлаган. Өстәмә фактор июнь–июльдә сумның көчсезләнүе булды.
Россиядә еллык инфляция июль аенда 5,98 процент тәшкил иткән, бер ай алданрак 6,02 процент булган. Шул ук вакытта бәяләрнең агымдагы үсеше бер елга күчереп исәпләгәндә июньдә 11,4 проценттан 11,6 процентка кадәр арткан.