Иң бәхетле кешеләр яшәүче Россия шәһәрләре аталды
Ел башыннан алып үз тормышыннан тулысынча яки өлешчә канәгать булган россиялеләрнең саны 80 проценттан 73кә төшкән.
(Казан, 3 май, “Татар-информ”). Үз тормышыннан канәгать кешеләрнең күпчелеге Владивостокта (87% халык), Томскида (86%), Липецкида һәм Оренбургта (85%), Череповецта, Грозныйда һәм Читада (84%) яши. Бу хакта Россия Хөкүмәте каршындагы Финанс университеты экспертлары тикшеренүенә сылтама белән “Российская газета” хәбәр итә.
“Ел башыннан алып, үз тормышыннан тулысынча яки өлешчә канәгать булган россиялеләрнең саны 80 проценттан 73кә төшкән”, - диелә хәбәрдә.
Тормышларыннан канәгать булучылар саны түбән булган шәһәрләр исемлегенең башында Владикавказ (63% халык), Хабаровск (69%), Воронеж, Петрозаводск һәм Ярославль (70%) тора.
Тикшерү Россиянең 250 меңнән артык халкы булган 78 шәһәрендә уздырылган.