Иҗат әһелләре тудыручы гына түгел, товарны халыкка җиткерүчеләр дә – Ренат Вәлиуллин
Татарстанның Санкт-Петербургтагы даими вәкиле Р.Вәлиуллин сүзләренчә, кеше үзе актив булган очракта гына ниндидер нәтиҗәләргә ирешә ала.
(Казан, 4 май, “Татар-информ”, Динә Йосыпова). Татарстан Республикасының Санкт-Петербург шәһәрендә һәм Ленинград өлкәсендәге вәкиле Ренат Вәлиуллин сүзләренчә, кеше үзе актив булган очракта гына ниндидер нәтиҗәләргә ирешә ала. Иҗат әһелләре тудыручы гына түгел, товарны халыкка җиткерүчеләр дә, диде Ренат Вәлиуллин “Татар-информ” мәгълүмат агентлыгында биргән интервьюсында.
“Рәссамның эше рәсемне ясадым да, шуның белән бетте, халык үзе килер, күрер түгел. Ул рәсемен күрсәтергә тиеш. Язучының да әсәре тик ятарга яки бик күп кешеләргә барып җитәргә мөмкин. Иҗат әһелләре тудыручы гына түгел. Алар шушы товарны халыкка җиткерүчеләр дә булырга тиеш. Билгеле, монда хөкүмәтнең дә күпмедер өлеше бар һәм ул булырга тиеш тә. Әмма кеше үзе актив булган очракта гына ниндидер нәтиҗәләргә ирешә ала”, - диде Татарстанның даими вәкиле.
ТРның Санкт-Петербург шәһәрендәге вәкиле мисал итеп язучы Ренат Вәлиуллинны китерде. “Ренат Вәлиуллин үзенең әсәрләрен яза, китапларын чыгара һәм аларны халыкка җиткерү өчен кайтып керми. Ул шул китапларын күтәреп, презентацияләр ясый, халык белән очраша. Ул укучыларын үзенә тарта, ул бик күп күләмдәге социаль челтәрләрне алып бара, халык белән төрле аралашу юлларын эзли. Шундый халәттә булганда, билгеле, синең хезмәтләрең белән кызыксыначаклар”, - диде ул.
Ренат Вәлиуллин сүзләренчә, иҗат кешеләре җир кешеләре түгел, аларның үзләренең дөньялары, үзләренең матурлыклары. “Без рәссамнарыбызның хезмәтләрен Татарстанга алып килеп, “Казан” милли-мәдәни үзәгендә, “Хәзинә” галереясендә күргәзмә уздырдык. Хәзер инде яңа идеяләр белән яшибез. Кешегә күбрәк күрсәтергә кирәк. Тагын бер үзенчәлекле рәссамыбызны әйтеп үтәсем килә. Ул - Роберт Миф. “Минем картиналарым бар. Алар үземнең балаларым төсле, минем аларны сатасым да килми. Ничектер бүләк итәргә мөмкин, ләкин алар минем өчен шул дәрәҗәдә якынга әйләнәләр, аларны сатсам, үземнән читкә озаткан кебек карыйм”, - ди ул. Алар бит иҗат кешеләре, җир кешеләре түгел. Аларның үзләренең дөньялары, үзләренең матурлыклары, һәрбер әйберне үзләренчә аңлаулары белән кадерле дә инде”, - диде Ренат Вәлиуллин.