Хоккей буенча дөнья чемпионаты старт ала
81 нче дөнья чемпионаты Германиянең – Кельн һәм Франциянең Париж шәһәрләрендә уза.
(Казан, 5 май, "Татар-информ"). Бүген дүрт матч белән Германиянең – Кельн һәм Франциянең Париж шәһәрләрендә хоккей буенча 81 нче дөнья чемпионаты старт ала. Россия хоккей җыелмасы төркем этабындагы уеннарны Кельнда, ә чемпионатның соңгы ике елдагы чемпионнары – Канада хоккейчылары Париж бозында уздыра. Россия хоккейчылары бүген 17:15 сәгатьтә Швеция җыелмасы белән очраша.
Кельндагы уеннар 18,5 мең тамашачы сыйдырылышлы "Ланксесс Арена" боз сараенда үтә. Россия хоккейчыларының төркем этабындагы көндәшләре – Германия, Америка, Швеция, Латвия, Словакия, Дания һәм Италия командалары. Париждагы "АккорХотелс Арена"да Франция, Канада, Чехия, Финляндия, Швейцария, Норвегия, Белоруссия һәм Словения командалары көч сынаша.
