Һиндстанның Казандагы генераль консулы: Татарстан белән хезмәттәшлек потенциалы чиксез
Татарстан белән Һиндстанның төрле өлкәләрдә хезмәттәшлек итү өчен чиксез потенциалы бар. Бу хакта «Татар-информ»га Һиндстанның Казандагы генераль консулы Джейсундхар Д. белдерде.
«Татарстан белән Һиндстанның хезмәттәшлек итү өчен потенциалы бик зур. Хәтта чиксез дип әйтергә дә була», - диде агентлык әңгәмәдәше.
Дипломатның Казанга беренче тапкыр гына килүе түгел. Ул Татарстанга беренче тапкыр 2018 елда, биредә Һиндстан мәдәнияте көннәре узган вакытта килде. Ул чакта шәһәр аны таң калдырган булган. Хәзер исә, аның сүзләренчә, Татарстан башкаласы тагын да ныграк үскән һәм яхшырган. Генераль консул фикеренчә, бу Һиндстан белән хезмәттәшлек өчен киң мөмкинлекләр ача.