Сәясәт 3 ноябрь 2024 16:12

Һиндстан Тышкы эшләр министрлыгы Казандагы саммитта 13 ил БРИКС партнеры булуны искәртте

Скопировать ссылку

Казанда узган БРИКС саммитында ким дигәндә 13 дәүләт оешма партнеры статусын алды. Бу хакта брифингта Һиндстан Тышкы эшләр министрлыгы рәсми вәкиле Рандхир Джайсвал искәртте.

«Аңлавымча, 13 ил партнер ил буларак кабул ителде. Бу БРИКС илләре коллектив рәвештә кабул иткән карар. Партнер ил статусы тулы хокуклы әгъзалыктан аерыла», - дип билгеләде дипломат (РИА Новости цитатасы).

«Бу конкрет мәсьәлә хәзерге вакытта ябылдымы-юкмы дигән сорауга килгәндә, мин әлеге 13 илнең партнер ил булуын аңлыйм», - дип өстәде ул.

Уналтынчы БРИКС саммиты Казанда 22-24 октябрьдә узды. Саммит барышында 13 дәүләт: Алжир, Беларусь, Боливия, Вьетнам, Индонезия, Казахстан, Куба, Малайзия, Нигерия, Таиланд, Төркия, Уганда һәм Үзбәкстан берләшмә партнеры статусын алды. Венесуэла исә, Бразилия каршы килү сәбәпле, мондый статусны ала алмады.

РФ тышкы эшләр министры Сергей Лавров партнер дәүләтләр категориясе барлыкка килүне БРИКСның яңа (берләшмәгә 2024 елдан кушылган) һәм элекке катнашучылары бер-берсе белән эшләп китә алганчы оешмага яңа әгъзалар кабул итү өчен бераз көтәргә кирәклеге белән бәйләде.

Сәхифәләр

Һиндстан Тышкы эшләр министрлыгы Казандагы саммитта 13 ил БРИКС партнеры булуны искәртте