Ульяновск өлкәсендә эшләүче татар табибына дәрәҗәле исем бирелде
Гөлсирә Физюкованың медицина ярдәме күрсәткәндә югары профессионализмы һәм күпьеллык намуслы хезмәте билгеләп үтелә.
(Казан, 30 апрель, «Татар-информ»). Ульяновск шәһәре стоматология поликлиникасының баш табибы Гөлсирә Физюковага «Россия Федерациясенең атказанган табибы» исеме бирелде.
Президент Владимир Путин шул хактагы указга имза куйды. Әлеге документта медикның медицина ярдәме күрсәткәндә югары профессионализмы һәм күпьеллык намуслы хезмәте билгеләп үтелә. Бу турыда «Өмет» газетасы хәбәр итә.
Танылган табибны дәүләт бүләге алуы уңаеннан Ульяновск өлкәсе Губернаторы вазифаларын вакытлыча башкаручы Алексей Русских котлады.
«Хөкүмәт исеменнән һәм шәхсән үз исемемнән сәламәтлек саклау тармагындагы казанышларыгыз өчен Сезгә рәхмәт сүзләре әйтәм. Сезнең күпьеллык хезмәтегез бик мөһим һәм зур әһәмияткә ия, без аны югары бәялибез. Сезнең коллегаларыгыз һәм рәхмәтле пациентларыгыз стоматология ярдәме үсешенә зур өлеш кертүегезне, профессиональлек сыйфатларыгызны һәм сайлаган һөнәрегезгә тугрылык саклавыгызны билгеләп үтәләр», — диде ул.
Сез яшь белгечләр өчен зирәк остаз да әле, бай тәҗрибәгез һәм тирән гыйлемегезне алар белән бик теләп бүлешәсез. Сезгә уңышлар һәм алдагы хезмәтегездә профессиональ казанышлар телим», — дигән Алексей Русских.