Балалар онкология, гематология һәм хирургия үзәге быел 1 июньгә ачылыр дип көтелә
Марат Садыйков коллегия утырышында шундый бурыч торганын әйтте.
(Казан, 25 гыйнвар, «Татар-информ», Гөлнар Гарифуллина). Казанда Республика балалар клиник хастаханәсе базасында Балалар онкология, гематология һәм хирургия үзәге быел файдалануга тапшырылачак.
«Үзәк быел 1 июньдә Балаларны яклау көнендә ачылырга тиеш», — диде Татарстанның сәламәтлек саклау министры Марат Садыйков коллегия утырышында.
Хастаханә проект буенча 100 урынга исәпләнгән.
Узган 2020 елда «Балаларга заманча медицина ярдәме инфраструктурасын булдыруны кертеп, Татарстан Республикасында балалар сәламәтлек саклау өлкәсе үсеше» төбәк проекты буенча республикада 30 балалар сырхауханәсе, Республика балалар клиник хастаханәсе яңа медицина җиһазлары алган.
107 берәмлек яңа җиһаз файдалануга тапшырылган.