Чаллыда тәүлек дәвамында Covid-19 инфекциясе белән мөрәҗәгать итүчеләр саны арткан

(Казан, 21 июнь, «Татар-информ», Эльвира Мөхәмәтдинова). Эшлекле дүшәмбе барышында Чаллының баш санитар табибы Илгизәр Бариев тәүлек дәвамында коронавирус инфекциясен йоктыручылардан мөрәҗәгатьләр саны артуын әйтте.

Кулланучылар хокукларын яклау һәм кеше иминлеге өлкәсендә күзәтчелек федераль хезмәте (Роспотребнадзор) вәкиле билгеләп үткәнчә, вазгыять тынычрак вакытта тәүлек дәвамында алты һәм аннан күбрәк очрак теркәлгән, хәзер авыру тәүлегенә уннан артык кешедә ачыклана.

Коронавирус пандемиясе башланганнан Чаллыда инфекция йоктыруның барлыгы 2 749 очрагы теркәлгән. Ул республиканың уртача күрсәткеченнән 11,6 процентка кимрәк, әмма хәл киеренке булып кала. 86 кеше медицина күзәтүе астында.

«Кимү тенденциясе юк. Россиянең төрле төбәкләрендә яңа очраклар саны артуны исәпкә алып, без госпитальләрдә резерв урыннар санын арттыру вариантларын карыйбыз», — ди Чаллының сәламәтлек саклау идарәсе башлыгы Александр Николаев.