Татарстанда тагын 30 кеше коронавирус йоктырган
Covid-19 инфекциясе йоктырган кешеләр белән элемтәдә булган 2,7 мең кеше табиблар күзәтүендә кала.
(Казан, 21 май, «Татар-информ», Эвилена Киселева). Татарстанда узган тәүлектә тагын 30 кеше коронавирус йоктырган.
«Узган тәүлектә республикада коронавирус йоктырукның 30 яңа очрагы теркәлгән. Республикада бу диагноз барлыгы 21 170 кешегә куелган», — диде «Татар-информ»да матбугат конференциясендә Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтнең Татарстан буенча идарәсе җитәкчесе урынбасары Любовь Авдонина.
Аның сүзләренчә, узган тәүлектә белгечләр яңа коронавируска 7,8 мең тест ясаган. Covid-19 инфекциясе йоктырган кешеләр белән элемтәдә булган 2,7 мең кеше табиблар күзәтүендә кала.
Татарстан сәламәтлек саклау министры урынбасары Владимир Жаворонков узган тәүлектә коронавирустан 16 кеше терелүен әйтте. Бу чирдән барлыгы 18 меңнән артык татарстанлы терелгән.