Татарстанда соңгы тәүлектә коронавирус инфекциясе йоктыруның 85 яңа очрагы ачыкланган
Эпидемия башланганнан алып республикада «коронавирус инфекциясе» диагнозы 10 424 тапкыр куелган.
(Казан, 1 декабрь, «Татар-информ»). Татарстанда соңгы тәүлектә Covid-19 коронавирус инфекциясе йоктыруның 85 яңа очрагы ачыкланган. Аларның бары тик берсе генә чирне читтә йоктырып кайткан. Бу хакта ТР Сәламәтлек саклау министрлыгының матбугат хезмәте хәбәр итә.
«22 кеше хастаханәгә озатылган, 63 кеше өендә дәвалана», - диелә ведомство хәбәрендә.
Инфекция йоктыручыларның күбесе 30-50 (28 кеше), 60-70 (22 кеше) һәм 70-80 яшь (15 кеше) аралыгында ачыкланган.
Коронавирус йоктыручылар саны буенча Казан шәһәре (44 очрак) әйдәп бара. Чаллы шәһәрендә – 10, Яшел Үзән районында җиде очрак ачыкланган.
Эпидемия башланганнан алып республикада «коронавирус инфекциясе» диагнозы 10 424 тапкыр куелган. 9 139 пациент (шуларның 64е – узган тәүлектә) терелгән.