Чирмешән хастаханәсенә 140 комплект вакцина кайтарылган
Прививка ясату өчен район үзәк хастаханәсенә мөрәҗәгать итәргә яки 8(84396) 2-52-54 телефоны буенча шалтыратып язылырга мөмкин.
(Чирмешән, 21 гыйнвар, «Татар-информ», «Безнең Чирмешән», Кадрия Гамирова). Чирмешән районы үзәк хастаханәсенә короновируска каршы 140 комплект вакцина кайтты. Бүгенге көнгә 35 кеше вакцинацияләнгән. Шуларның ундүрте икенче этапны узган, аларга вакцинаның икенче комплекты да кертелгән.
Прививка ясатучыларның унҗидесе медицина хезмәткәрләре, мәгариф тармагында эшләүче — биш һәм шул кадәр үк социаль хезмәткәр дә әлеге вакцинаны кадаткан. Вакцина ясатучылар арасында коммуналь хезмәткәрләр, волонтерлар да бар. 60 яшьтән узган бер кеше дә коронавирустан саклануның шушы ысулын сайлаган. Бу турыда район басмасы хәбәр итә.
Прививка ясату өчен район үзәк хастаханәсенә мөрәҗәгать итәргә яки 8(84396) 2-52-54 телефоны буенча шалтыратып язылырга мөмкин. Бу эшне дәүләт порталы аша да башкарырга була.
Вакцина ясату алдыннан пациентны терапевт тикшерә, ул рөхсәт итсә, прививка ясату кабинетына юллый.