Татарстанда тагын 87 кеше ковид йоктырган
Пандемия башланганнан бирле республикада 15,1 мең кеше коронавирус белән авырган.
(Казан, 20 гыйнвар, «Татар-информ»). Соңгы тәүлек эчендә 87 татарстанлы коронавирус инфекциясе белән чирләгән, өч кеше инфекцияне республикадан читтә йоктырган.
«24 кеше хастаханәгә урнаштырылды, 63 кеше өйдә дәвалана», — диделәр ТР Сәламәтлек саклау министрлыгының матбугат хезмәтендә.
29 очрак 30-50 яшьлек татарстанлылар арасында ачыкланган, шулай ук коронавирусны 18 яшьтән кечерәк ике кеше йоктырган.
Авыручыларның күбесе Казанга туры килә — Татарстан башкаласында 61 кеше чир йоктырган. Районнар арасында иң күп авыручылар Яшел Үзән (дүрт), Биектау һәм Чистай (өчәр кеше) районнарында теркәлгән.
Республикада пандемия башланганнан бирле барлыгы 15,1 мең кеше авырган, 11,5 меңгә якын кеше, шул исәптән узган тәүлектә 76 кеше терелгән.