Чирмешәндә эшмәкәрләр һәм иганәчеләр ун меңнән күбрәк битлек теккән

Бу битлекләрне, юып, кабат кулланырга мөмкин.

(Чирмешән, 18 апрель, «Татар-информ», «Безнең Чирмешән», Кадрия Гамирова). Чирмешәндә эшмәкәрләр һәм иганәчеләр ун меңнән күбрәк битлек теккән. Изге эштә авылларда яшәүче хатын-кызлар да катнашты. Бу турыда район басмасы хәбәр итә.

Битлек тегүчеләр моңа кадәр оешмаларга заказлар буенча теккәннәр, хәзер инде аларның сатуга чыгарырга да товарлары бар. Бу саклагыч чараларны эшмәкәрләрнең үзләреннән һәм район үзәгендәге «Булгар» кибетеннән сатып алырга була. Бу битлекләрне, юып, кабат кулланырга мөмкин.

"Район инвалидлар оешмасы битлекләр тегеп, таратты. Бу эштә Әмир, Туймәт һәм Кара Чишмә авылларында яшәүче апалар актив катнашты", — диде район башкарма комитеты җитәкчесенең икътисад мәсьәләләре буенча урынбасары Марат Әһлиуллин.

Битлек тегү эшенә район мәгариф һәм мәдәният бүлекләре хезмәткәрләре дә кушылды. Алар полиция хезмәткәрләренә заказ буенча тегеп бирде. Әгәр ихтыяҗ булса, алар битлекләрне тагын тегәргә әзер.