Татарстанда узган тәүлектә 33 кеше коронавирус инфекциясе йоктырган, 31 кеше терелгән

Инфекция йоктыручыларның күбесе Казанда (18 кеше) теркәлгән.

(Казан, 16 июль, «Татар-информ»). Татарстанда соңгы тәүлектә яңа төрдәге Covid-19 коронавирус инфекциясе йоктыруның 33 яңа очрагы ачыкланган. Аларның барысы да инфекцияне башка авырулар белән аралашу нәтиҗәсендә эләктергән. ТР Президентының матбугат хезмәте җитәкчесе Лилия Галимова «Татар-информ» агентлыгына шул хакта хәбәр итте.

«11 кеше хастаханәгә озатылган, 22 кеше өендә дәвалана», - диде Галимова.

Авыруларның күбесе 30-50 яшь (12 кеше) аралыгында һәм 60-70 яшь аралыгында (9 кеше) ачыкланган.

Инфекция йоктыручыларның күбесе Казанда (18 кеше) һәм Биектау районында (өч кеше) теркәлгән.

Эпидемия башланганнан алып республикада яңа төрдәге Covid-19 коронавирус инфекциясенең 5126 очрагы теркәлгән, 3979 кеше (шулардан 31 кеше – узган тәүлектә) терелгән.