Татарстанда коронавирус инфекциясенең тагын 70 яңа очрагы ачыкланган

Республикада бер тәүлек эчендә 7,8 мең кеше коронавируска тест узган.

(Казан, 15 февраль, «Татар-информ», Эвелина Киселёва). Татарстанда соңгы тәүлектә Covid-19 коронавирус инфекциясе йоктыруның 70 яңа очрагы ачыкланган.

Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) ТР буенча идарәсе җитәкчесе урынбасары Любовь Авдонина «Татар-информ» агентлыгында узган матбугат конференциясендә хәбәр иткәнчә, узган тәүлектә республикада яңа коронавирус инфекциясенең 70 очрагы теркәлгән.

«Шул рәвешле, Татарстанда коронавирус йоктыручыларның гомуми саны 17 237 кешегә җитте», - дип искәртте спикер.

Авдонина сүзләренчә, белгечләр бер тәүлек эчендә коронавируска 7 890 тест үткәргән.

ТР сәламәтлек саклау министры урынбасары Владимир Жаворонков Татарстанда 13 704 кешенең коронавирустан терелүен әйтте.