Татарстанда коронавирустан тагын ике кеше үлгән

Республикада Covid-19 инфекциясеннән барлыгы 121 үлем очрагы теркәлгән.

(Казан, 14 ноябрь, «Татар-информ»). Татарстанда коронавирус инфекциясеннән ике үлем очрагы расланган. Бу хакта ТР Сәламәтлек саклау министрлыгының матбугат хезмәте хәбәр итә.

1958 елда туган ир-ат ике яклы пневмониядән хәле катлауланган килеш коронавирус белән хастаханәгә салына. Хроник авырулары булган.

1984 елда туган хатын-кыз пневмония белән йогышлы авырулар госпиталенә китерелә. Хәле хроник авырулары кискенләшүе халәтендә начарланган.

«Үлем сәбәпләре патологоанатомик экспертиза нәтиҗәсендә билгеләнгән. Вирус идентификацияләнгән», - диелә хәбәрдә.

Татарстанда Covid-19 инфекциясеннән барлыгы 121 үлем очрагы теркәлгән.