Татарстанда тәүлек эчендә Covid-19 инфекциясенең 29 яңа очрагы расланган

Республикада коронавирус инфекциясе тарала башлаганнан бирле 5 мең 988 кеше авырды.

(Казан, 13 август, «Татар-информ», Эвелина Киселева). Татарстанда узган тәүлек эчендә Covid-19 инфекциясе белән зарарлануның 29 яңа очрагы теркәлгән. Бу хакта «Татар-информ» мәгълүмат агентлыгында узган матбугат конференциясендә Роспотребнадзорның ТР буенча идарәсе җитәкчесе урынбасары Любовь Авдонина сөйләде.

«Узган тәүлектә республикада коронавирусның 29 яңа очрагы теркәлде. Шулай итеп, Татарстан Республикасында барлыгы 5 мең 988 очрак булды», — диде спикер.

Аның сүзләренчә, авыруны элемтә юлы белән йоктырган 915 татарстанлыны һәм чит илләрдән килгән дүрт кешене табиблар күзәтә.

Тәүлек эчендә коронавирска 4858 тест үткәрелгән.

ТР сәламәтлек саклау министры урынбасары Владимир Жаворонков, коронавирустан тәүлек эчендә республиканың 19 кешесе дәваланды, дип өстәде. ИВЛ аппаратына 33 кеше тоташтырылган.