Әлмәт районы башлыгы ярдәмчесе коронавирус йоктырган

Әнүзәр Юнысовның авыруы симптомларсыз уза.

(Казан, 13 май, «Татар-информ»). Әлмәт районы башлыгы ярдәмчесе Әнүзәр Юнысов Covid-19 инфекциясе йоктырган. Бу хакта Instagram социаль челтәрендә туры эфир вакытында район башлыгы Тимур Нагуманов хәбәр итте.

Юнысов туры эфирга кушылып, үзен ничек хис итүе турында сөйләде. Муниципалитет хезмәткәре үз-үзеңне изоляцияләү режимында өйдә тора, аның авыруы симптомларсыз уза.

Аның фикеренчә, авыруны кибеттә перчаткасыз йөргәндә йоктырган булуы мөмкин. Covid-19 авыруын җиңел кичерүдә сәламәт яшәү рәвеше һәм нык иммунитет булыша, дип саный Тимур Нагуманов ярдәмчесе.