Татарстан мәктәпләре һәм вузларында 52 укытучы һәм укучыда коронавирус табылган

Казанның дүрт мәктәбендә сигез сыйныф ОРВИ аркасында карантинга киткән.

(Казан, 12 октябрь, «Татар-информ», Эвелина Киселёва). Татарстанда 52 мәгариф системасы хезмәткәре, мәктәп укучысы һәм студентта яңа коронавирус инфекциясе табылган. Россия Кулланучы хокукларын яклау буенча күзәтчелек хезмәтенең (Роспотребнадзор) Татарстандагы идарәсе җитәкчесе урынбасары Любовь Авдонина «Татар-информ» агентлыгында узган матбугат конференциясендә шулай дип белдерде.

«Бүгенге көндә бездә мәктәп укучылары, студентлар һәм педагоглар (11 укучы, 11 студент һәм 30 педагог) арасында 52 очрак теркәлде. 25 чыганак ябылды – алар бер авыру очрагы белән төгәлләнде, 27 чыганак табиблар күзәтүендә кала. Күзәтүләрнең чиге – 24 октябрь», - дип искәртте спикер.

Любовь Авдонина Казанда бер атнада ОРВИ аркасында дүрт мәктәптә сигез сыйныф ябылуын әйтте, аларда укучыларның 20 проценты авырый.

«Татар-информ» агентлыгы Татарстанга 34 кешенең курортлардан яңа төрдәге Covid-19 коронавирус инфекциясен алып кайтуы хакында хәбәр иткән иде.