Узган тәүлек эчендә Татарстанда коронавирусның 32 очрагы ачыкланган
Республикада пандемия башыннан бирле Covid-19 авыруының 7 мең 480 очрагы теркәлгән.
(Казан, 9 октябрь, «Татар-информ», Эвелина Киселева). Татарстанда узган тәүлек эчендә коронавирус авыруының 32 яңа очрагы теркәлгән. Бу хакта «Татар-информ» мәгълүмат агентлыгында үткән матбугат конференциясендә Кулланучы хокукларын яклау күзәтчелеге (Роспотребнадзор) хезмәтенең Татарстан Республикасы буенча идарә җитәкчесе урынбасары Любовь Авдонина хәбәр итте.
«Үткән тәүлек эчендә республикада коронавирус инфекциясенең 32 яңа очрагы теркәлде. Шулай итеп, Татарстан Республикасында барлыгы 7 мең 480 очрак бар», — диде Авдонина.
Любовь Авдонина сүзләренчә, тәүлек эчендә коронавирус авыруына 6 меңгә якын ПЦР-текст уздырылган. Covid-19 инфекциясе белән авыру шиге булган яисә авыручылар белән контактта торган 785 кешене табиблар күзәтеп тора.
Татарстан сәламәтлек саклау министры урынбасары Владимир Жаворонков хәбәр итүенчә, тәүлек эчендә республиканың 19 кешесе коронавирус авыруыннан терелгән.