Табиб Россиядә коронавирустан үлем-китем дәрәҗәсе ни өчен югары булуын аңлатты

(Казан, 8 октябрь, «Татар-информ»). Соңгы атнада Россиядә коронавирустан үлүчеләр саны буенча берничә тапкыр антирекорд куелды. Моның бер сәбәбе – вирустан саклану чараларын үтәүдән вакытыннан алда баш тарту. Бу хакта Sputnik радиосы хәбәр итә.

«Теләсә нинди инфекция вакытында иң мөһиме – эпидемиологик шартларны үтәү. Метродагы 20 кешенең икесе генә битлектән, калганнары кияргә «оныткан». Бу зур роль уйный һәм үлем-китем очраклары арта», - дип белдерде табиб-терапевт, Р.Н.Ходанова исемендәге Иммунокоррекция үзәге генераль директоры Людмила Лапа.

Табиб билгеләп үткәнчә, бу вазгыятьтә иң куркынычы – кешеләрнең аралашуны киметергә җыенмавы. Әмма Covid-19 – кешелек инде җайлашып өлгергән гадәти инфекция түгел, шунлыктан иркенәергә иртәрәк әле.

Коронавирустан үлем-китемнең югары булуында икенче сәбәп – инфекция йоктырганнан соң хроник авыруларның көчәюе.

Һәм, ниһаять, моңа вирусның тискәре нәтиҗәләре дә йогынты ясый.