Коронавирус белән авыручыларны дәвалый торган табибларга аена 80 мең сум түләнәчәк

Россия Президенты өч айга өстәмә федераль түләү билгеләргә тәкъдим итте.

(Казан, 8 апрель, «Татар-информ»). Россия Президенты Владимир Путин төбәк башлыклары белән киңәшмә кысаларында коронавирус белән авыручыларны дәвалаучы медицина персоналы өчен махсус федераль өстәмә түләү билгеләргә тәкъдим итте. Авыручылар белән эшләүче табиблар өчен өстәмә түләү аена 80 мең сум булырга тиеш.

«Коронавирус белән авыручыларны дәвалаучы һәм минут саен үз сәламәтлекләрен куркыныч астына куючы белгечләргә апрельдән башлап өч айга махсус федераль түләү билгеләргә», — диде Владимир Путин.

Урта медицина персоналына (фельдшер, шәфкать туташы) аена 50 мең сум түләячәкләр, ә кече медицина персоналы хезмәткәрләре аена 25 мең сум өстәмә акча алачак.