Татарстанда коронавирус очраклары теркәлмәгән районнар билгеле

Соңгы ун көндә яңа очраклар сигез районда ачыкланган.

(Казан, 5 май, «Татар-информ», Гөлнар Гарифуллина). Татарстанда коронавирус очраклары теркәлмәгән районнар билгеле. Бу Балык Бистәсе, Әлки, Зәй, Кама Тамагы, Минзәлә, Мөслим районнары. Бу хакта бүген ТР Министрлар Кабинетында брифингта мәгълүм булды.

Роспотребнадзор хезмәтенең Татарстан буенча идарәсе җитәкчесе Марина Патяшина Татарстанда коронавирусның 1208 очрагы ачыкланганын әйтте. Инфекция 39 районда теркәлгән.

«Соңгы ун көндә яңа очраклар сигез районда ачыкланды. Болар Әтнә, Чирмешән, Кайбыч, Югары ослан, Спас, Апас, Ютазы, Актаныш районнары. Чирнең иң күп таралышы зур шәһәрләрдә күзәтелә», — диде ул.

Теләче, Чүпрәле, Лаеш, Әтнә, Питрәч, Биектау районнарында коронавирус белән авыру күрсәткечләре югары дәрәҗәдә санала.