Халыкара "Татар кызы-2018" финалында Чиләбене ике туташ тәкъдим итәчәк
Чиләбедә "Татар кызы" конкурсының өлкә этабында җиңүчеләрне сайладылар.
Скопировать ссылку
(Казан, 5 июль, "Татар-информ"). Чиләбене Халыкара "Татар кызы-2018" финалында ике туташ тәкъдим итәчәк. Бу хакта Чиләбе өлкәсе Татарлары конгрессы хәбәр итә.
"Татар кызы-2018" төбәк конкурсында Златоуст шәһәреннән Ризидә Мигранова беренчелекне яулаган. Икенче урынга Магнитогорск каласыннан Илина Канбекова лаек булган. Алар икесе дә Казанда октябрь аенда узачак "Татар кызы-2018" Халыкара бәйгесенең финал өлешендә катнашачак.
- Ризидә Мигранова - булачак табиб. Ул мәктәпне "алтын" медальгә тәмамлаган. Мәктәптә инглиз телен тирәнтен өйрәнгән. Волонтерлык белән актив шөгыльләнә. "Неотложка" студентлар медицина отрядын җитәкли.
- Илина Канбекова Магнитогорск Дәүләт техник университетын "яхшы" билгеләргә тәмамлаган. Иҗтимагый эшләрдә актив катнашырга ярата. "Татары Магнитки. Ялкын" татар яшьләре оешмасын җитәкли.
