Татар әдәбияты 25 апрель 2023 00:09

Һади Такташ. ***(«Җил сөйли, үкрә миңа...»)

Скопировать ссылку

***
Җил сөйли, үкрә миңа, син ят тудың, ди, дөньяга...
Ил сөйли... шомлы көлә, син, ди, явыз, динсез бала.
Кем яраткан? Ник яраткан? Нинди сергә баглы мин?..
Кем дә белми, кем дә әйтми... Аһ! Үләм мин кайгудин...

Бар да – шәфкатьсез, аяусыз, таш йөрәкле бәндәләр,
Чорнап алган да көләләр ыржаеп «ул» гәүдәләр...
Үтте еллар... Эзләдем мин, эзләдем бер тугры дин,
Тапмадым, әмма югалттым бар иман, «алла»мны мин...

Бирмәде нур ай, кояшлар, тугры юлга салмады,
Сахирә* нурлар, бөек уйлар бары да алдады...
Барча шатлык, бар матурлык үзгә төс алган миңа,
Бар кануннар – бер фахиш уй, канлы эз, – ялган миңа.

Мин караңгылыкта мәңге-мәңге, ялгыз мин генә...
Кем белә, әйтсен иде, аһ! Ник яралдым мин менә?!

юану:

Мин яралдым серле моңнарым белән бар дөньяны
Еглатырга. Әйе, миндә көчле Байроннар җаны.
Көн килер, күз яшьләрем тормыш күгендә ялтырар...
Дәртле җырларым моңыннан ил елар...
Әйе, минем көчле рухымнан җир вә күкләр калтырар.
(1921)

*Сахирә – сихерләүче.

Такташ Һади (Мөхәммәтһади Такташев) (1901-1931) – шагыйрь, хәзерге татар поэзиясенә нигез салган әдипләрнең берсе. Проза, балалар әдәбияты һәм драматургия өлкәсендә дә иҗат итә. Тумышы белән Тамбов губернасы, Спас өязе Сыркыды авылыннан (хәзер – Мордовия Республикасында). Урта Азиядә, Оренбургта яшәп ала, Казанга кайткач вакытлы матбугат редакцияләрендә эшли.

#һади такташ шигырьләре #һади такташ #хади такташ

Сәхифәләр

Һади Такташ. ***(«Җил сөйли, үкрә миңа...»)