Самара өлкәсеннән Гөлшат Минхәерова: Яратам мин балаларны, шуңа да мин – мөгаллим
Яңа белемнәр үзләштерергә беркайчан да соң түгел!
(Казан, «Татар-информ», «Бердәмлек», Рагидя Бадыкова) «Яратам мин балаларны, шуңа да мин – мөгаллим!» Бу сүзләрдә — бөтен бер язмыш, бөтен бер тормыш юлы. Шушы гади генә җөмләдә укытучы һөнәренең төп мәгънәсе чагыла: балаларны сөю, аларга үзенең йөрәк җылысын, үзенең белемен, үзенең тормыш тәҗрибәсен бүләк итү.
Самара өлкәсендәге Денис авылы мәктәбенең башлангыч сыйныфларында татар теле һәм әдәбияты дәресләрен укытучы Гөлшат Җәүдәт кызы Минхәерова — нәкъ шундый мөгаллимнәрнең берсе. Ул 1994 елда Бөгелмә педагогия училищесын тәмамлаган һәм шуннан алып бүгенге көнгә кадәр үз һөнәренә тугры булып кала – менә инде 32 ел туган мәктәбендә белем бирә.
Гөлшат Минхәерова — югары квалификацияле категорияле укытучы. Ләкин аның өчен «югары категория» төшенчәсе нәкъ менә шушы «балаларны яратам» сүзләреннән башлана. Чөнки һөнәри осталык та, фәнни казанышлар да, методик эшләнмәләр дә бары тик шул нигездә генә мәгънәгә ия була ала.
Гөлшат Җәүдәтовна даими рәвештә иҗади эзләнүдә — педагогика фәненең яңа казанышларын үзләштерә, үзе төзегән дәрес моделе нигезендә укучыларны мәгълүмат белән эш итәргә өйрәтә. Аның дәресләре җентекле әзерлек, һәр этапны төптән уйлап эшләү, кулланылган технологияләрнең максатка ярашлы булуы белән аерылып тора. Һәм моның нәтиҗәсе – балаларның югары сыйфатлы белеме, аларның фән белән кызыксынуы.
Гөлшат Җәүдәтовна укыту һәм тәрбия процессын дәрес белән генә чикләми. Укучыларның предметка карата кызыксынуын арттыру өчен алар белән бергә иҗтимагый әһәмиятле проектларны гамәлгә ашыра. Аның балалары төрле дәрәҗәдәге бәйгеләрдә призлы урыннар яулыйлар. Алар арасында — «Сугыш балалар күзе белән» өлкә иҗади эшләр конкурсы, округ күләмендә уздырылган «Ватанны саклаучы көне» компьютер рәсемнәре конкурсы, «Без бу хәтергә тугрылыклы» төбәк конкурсы, «Экология һәм кеше» Бөтенроссия плакатлар конкурсы. Шулай ук «Рус аюы», «Олимпус» кебек олимпиадаларда һәм бәйгеләрдә аның тәрбияләнүчеләре призер булып торалар.
Класс җитәкчесе буларак, Гөлшат ханым сыйныфта укучылар үзидарәсен оештыруга, тугры һәм актив коллектив формалаштыруга, сәламәт яшәү рәвешенә ихтыяҗ тәрбияләүгә зур игътибар бирә. Аның классы, районда, округта үткәрелгән спорт ярышларында, «Куркынычсыз тәгәрмәч» бәйгесендә, ЮИД агитбригадалары конкурсында актив катнашып, уңышларга ирешә.