Гөлнара Габдрахманова шәҗәрәләрдә очрый торган хаталарны әйтте

Скопировать ссылку

Татарстан Республикасының Архив эше буенча дәүләт комитеты рәисе Гөлнара Габдрахманова бүген Дәүләт Советының 37 нче утырышында «Ядкәр» генеалогик проектын гамәлгә ашыру турында сөйләде. Шәҗәрәләрне төзегәндә еш очрый торган хаталарны әйтте.

«Конкурсларга килгән шәҗәрәләрне тикшерү барышында, күпсанлы хаталарга юлыктык. Мәсәлән, кешеләр өлешчә генә тәрҗемә итә яки дөрес тәрҗемә итми, шуның аркасында шәҗәрәләр төзелешендә хата китә, чит ата-бабаларны үз шәҗәрәсенә кертергә мөмкиннәр. Бу хаталар берничә факторга бәйле. Беренче чиратта, иске татар телендә язылган архив документларын аңлау кыенлыгы белән», - диде Гөлнара Габдрахманова.

2018 елдан төрле яшь төркемнәре өчен «Минем шәҗәрәм» генеалогик тикшеренүләр конкурсы уздырыла башлаган. 2019 елдан «Тарихта без эзлебез» фестивале оештырыла. Конкурсларга тәкъдим ителгән шәҗәрәләр махсус портал булдыру кирәклеген күрсәткән.

Архив эше буенча комитет рәисе соңгы берничә дистә елда Россиядә һәм дөньяда шәҗәрәләрне өйрәнүгә кызыксыну артканын билгеләп узды. Дәүләт архивына генеаологик мөрәҗәгатьләр саны артуы шул хакта сөйли.

Шәҗәрәсен төзү үтенече белән еш кына танылган шәхесләр дә мөрәҗәгать итә. Мисал өчен, ул опера җырчысы Аида Гарифуллина гаиләсеннән шундый үтенеч килгәнен әйтте. Үз шәҗәрәсен төзү турында мөрәҗәгатьләр якын һәм ерак чит илләрдән дә килгән.

Гөлнара Габдрахманова сүзләренчә, генеаологик мәгълүматны үз эченә алган чыганакларга мөрәҗәгать итү рәвешендә традицион эзләү алымнары еш кына катлаулы була. Шуңа күрә автоматлаштырылган эзләү системаларын гамәлгә кертү мәсьәләсе көн үзәгенә куелган.

«Ядкәр» порталының асылы, милләте һәм диненә карамастан, Татарстандагы һәр гаиләнең шәҗәрәсен булдыру һәм туганлык җепләрен ачыклаудан гыйбарәт. Гади шәҗәрә төзү өч айдан берничә елга кадәр сузылырга мөмкин, тамырларны эзләүне еш кына ата-бабаларның читкә китүе дә кыенлаштыра. «Ядкәр» проекты кысаларында барлык метрика кенәгәләрен, ревизия әкиятләрен туплау шушы проблеманы хәл итә», - диде Гөлнара Габдрахманова.

Сәхифәләр

Гөлнара Габдрахманова шәҗәрәләрдә очрый торган хаталарны әйтте