Гөлнара Габдрахманова: Депутатлар, министрлар шәҗәрәләрен төзүне сорап мөрәҗәгать итте

Скопировать ссылку

Татарстан Дәүләт Советының күп кенә депутатлары һәм министрлар нәсел шәҗәрәләрен төзү өчен мөрәҗәгать иткән.

Шәҗәрәләр төзү буенча «Ядкәр» порталы турында Татарстан парламентының 37нче утырышында ТР Архив эше буенча дәүләт комитеты рәисе Гөлнара Габдрахманова сөйләде.

Ул проектның Татарстанның беренче Президенты, Дәүләт Киңәшчесе Минтимер Шәймиевнең туган ягы Актаныш районы Әнәк авылыннан башланганын искәртте. «Нәкъ менә ул беренче булып проектны гамәлгә ашыруны хуплаган кеше», - диде Гөлнара Габдрахманова.

«Беренчеләрдән булып, безнең проектка Татарстан Дәүләт Советы депутатлары - Лотфулла Шәфигуллин һәм Алсу Нәбиева кушылды. Моның өчен аларга зур рәхмәт. Бүгенге көнгә Васил Шәйхразыевның (ТР вице-премьеры - Т.И. искәрмәсе) шәҗәрәсен төзедек. Күп кенә министрлар да кушылды», - дип сөйләде комитет рәисе.

Ул шәҗәрәсен төзү үтенече белән еш кына танылган шәхесләр мөрәҗәгать иткәнен әйтте. Мисал өчен, соңгылардан булып опера җырчысы Аида Гарифуллина гаиләсеннән шундый үтенеч килгән. «Шәҗәрә төзүне сорап, якын һәм ерак чит илләрдән дә мөрәҗәгать итүчеләр бар», - диде Габдрахманова.

Сәхифәләр

Гөлнара Габдрахманова: Депутатлар, министрлар шәҗәрәләрен төзүне сорап мөрәҗәгать итте