Германия татарлары Европа халкына сыйфатлы татар киносын күрсәтте
Берлин татар яшьләре оешмасы җитәкчесе Тимур Харрасов “Мулла” фильмы Германиядә зур кызыксыну уятканын, татар мәдәниятен танытырга кирәклеген әйтте.
(Казан, 8 октябрь, “Татар-информ”, Лилия Гаделшина). Татарстанда төшерелгән “Мулла” фильмы беренче тапкыр немец телендә тәкъдим ителде. Татар фильмын 5 октябрьдә – Берлинда, 6 октябрьдә Франкфурт-на-Майне шәһәрендә күрсәттеләр, дип хәбәр итте Берлин татар яшьләре оешмасы җитәкчесе Тимур Харрасов. Шулай ук бу атнада “Мулла”ны Швейцариянең Женева, Австриянең Вена һәм Чехиянең Прага калаларында күрсәтергә планлаштыралар.
- “Мулла” фильмының премьерасы драматург Туфан Миңнуллин пьесасы буенча һәм Татарстан Президенты Рөстәм Миңнеханов ярдәме белән 2018 елда булган иде. Режиссерлары – Әмир Галиәскәров белән Рамил Фазлыев, продюсерлары – Миләүшә Айтуганова белән Марат Әхмәтшин. Төп рольне Рамил Фазлыев башкара.
“Бу фильмны Европа татарларына һәм тамашачыларына күрсәтү идеясен Франкфурттагы "Ханым" оешмасы җитәкчесе Гөлнур Даутова тәкъдим итте. Без хуплап алдык. Бөтен оештыру чыгымнарын үзебез күтәрдек. Германиягә Марат Әхмәтшин килде. Берлинда “Авиатор” кафесында җыелдык. Әлеге очрашу – фильм карау гына түгел, ә Европада яшәүче милләтләрне татарлар һәм Татарстан белән таныштыру чарасы булды”, – ди Тимур Харрасов.
Берлинда фильмны карарга 40ка якын кеше килгән, алар арасында алман, итальян, француз, латыш һәм руслар да булган. Моңа кадәр фильмга рус һәм инглиз телендә субтитрлар ясалган иде, Германиядә яшәүче татарлар аларны алман теленә тәрҗемә иткән. “Алман теленә Лилия Иксанова тәрҗемә итте, шулай ук без инглизчә текстларны да камилләштердек”, – диде Тимур. Фильмны караучыларда татарлар һәм Татарстан турында зур кызыксыну барлыкка килгән, алар милли-мәдәни кичәне оештыручыларга, фильмның продюсерына күп сораулар яудырган, фильмны тагын бер тапкыр карарга теләк белдергән.
"Сценарий, музыка, режиссер, актерлар, оператор эше булсынмы – фильм бар яктан да сыйфатлы итеп башкарылган. "Мулла" – татарларны, татар телен таныта торган сыйфатлы фильм. Яшьләр арасында татар телен таныту өчен сыйфатлы контент кирәк. Шул исәптән, татарча фильмнар. “Мулла” фильмы белән Татарстанның заманча татар киноиндустриясе үсешендә зур адым ясалды дип уйлыйм", – диде Тимур Харрасов.
