Спорт 22 гыйнвар 2018 17:33

Әгерҗенең кызлар футбол командасы Татарстан чемпионы булды

Әгерҗе командасы биш көндәшен дә җиңеп, 15 очко туплаган.

Скопировать ссылку

(Казан, 22 гыйнвар, "Татар-информ", "Әгерҗе хәбәрләре"). Әгерҗенең “Кадетлар“ футбол командасы белем бирү учреждениеләре арасында уздырылучы спартакиаданың республика этабында җиңү яулады. Бу турыда "Әгерҗе хәбәрләре" сайты җиткерә.

Татарстан башкаласында узган ярышта зона турларында җиңгән алты команда – Казан, Әлмәт, Чүпрәле, Саба, Аксубай, Әгерҗе районнарыннан футболчы кызлар катнашкан.

Әгерҗе командасы биш көндәшен дә җиңеп, 15 очко туплаган.

"Казан командасы капкасына ике период эчендә алты гол кертүгә ирештеләр шәкертләрем. Ә менә Чүпрәле кызлары белән тырышырга туры килде. Җиңел атлетика белән шөгыльләнүче көндәшләргә күз иярмәде. Әмма безнең кызлар аларны барыбер 1:0 исәбе белән җиңде", - дип сөйләгән тренер Илдар Идиятов.

Әгерҗе шәһәренең 2нче мәктәп футбол командасы, шулай итеп, республикада дүрт тапкыр чемпион исеменә лаек булды. Икенче урынны – Чүпрәле, өченчене Казан командалары алды, диелә хәбәрдә.

Ике атнадан алар Ульяновскида узачак Идел буе федераль округы спартакиадасында Татарстан данын яклаячак.

#Әгерҗе #футбол

Сәхифәләр

Әгерҗенең кызлар футбол командасы Татарстан чемпионы булды