Җәмгыять 21 февраль 2018 09:00

Әгерҗедә “Әйдә, сайлауга“ республика проекты гамәлгә куелды

Сайлау көнне Әгерҗе районында 48 сайлау участогы иртәнге 8дән кичке 8гә кадәр эшләячәк.

Скопировать ссылку

(Әгерҗе, 21 февраль, “Татар-информ“, "Әгерҗе хәбәрләре", Мария Нуруллина). Әгерҗедә “Әйдә, сайлауга“ республика проекты гамәлгә куелды. “Кадрлар резервы“ республика проекты кысаларында Әгерҗе районы территориаль сайлау комиссиясе рәисе урынбасары Ләйсән Хәкимова һәм “Олимп“ спорт комплексы директоры Рөстәм Гобәйдуллин яшьләргә Россия Президентын сайлау үзенчәлекләре хакында сөйләделәр, дип яза җирле басма.

Очрашуга яшь сайлаучылар – Түбән Кама агросәнәгать көллияте филиалы студентлары һәм шәһәр мәктәпләренең югары сыйныф укучылары чакырылган иде. Чара әңгәмә форматында узды.

Россия Президентын сайлаулар 18 мартта узачак. Дәүләт башлыгы тавыш бирү юлы белән алты ел срокка сайлана.

Булачак сайлаучыларның күп кенә сораулары бар иде. Әйтик, башка төбәктә ничек итеп тавыш бирергә, берничә участокта тавыш бирергә мөмкинме, бюллетень бозылса, нишләргә?

–Әгәр кеше сайлау көнне теркәлү урыны буенча үз участогына килә алмый икән, ул булу урыны буенча участокта тавыш бирә ала. Аның эш буенча китүе дә, бер урында теркәлгән булып, икенче шәһәрдә эшләве йә укуы да мөһим түгел. Иң әһәмиятлесе – башка участокта тавыш бирү хакында гариза язу, – дип аңлатты Ләйсән Хәкимова.
Гаризаны үзеңә уңайлы юл белән бирергә була. Моның өчен йә территориаль яки участок сайлау комиссиясенә барырга, йә күпфункцияле үзәккә килергә, йә дәүләт хезмәтләре порталыннан файдаланырга мөмкин. Гаризаны бер тапкыр гына язарга ярый.

Сайлау көнне Әгерҗе районында 48 сайлау участогы иртәнге 8дән кичке 8гә кадәр эшләячәк.

Сайлау участоклары урнашкан биналарда матур стендлар урнаштырыла. Алар янына басып теләге булган һәркем фотога төшә ала. Фотоны #Айданавыборы хештегы белән социаль челтәрләрдә урнаштыручылар призлар уйнатуда катнашу мөмкинлеге дә ала.

#Әгерҗе хәбәрләре

Сәхифәләр

Әгерҗедә “Әйдә, сайлауга“ республика проекты гамәлгә куелды