Әгерҗедә “Батырлыкка – 30 ел, хәтергә – 30 ел“ бәйгесе игълан ителде
Җиңүчеләр тантаналы төстә бүләкләнәчәк.
(Әгерҗе, 20 гыйнвар, "Татар-информ", "Әгерҗе хәбәрләре"). Әгерҗе районы балалар китапханәсе Татарстан Хәрби комиссариаты белән берлектә совет гаскәрләрен Әфганстаннан чыгаруның юбилей елы уңаеннан укучылар арасында “Батырлыкка – 30 ел, хәтергә – 30 ел“ исемле иншалар һәм эзләнү эшләре игълан итте. Бу турыда җирле басма хәбәр итә.
Шул уңайдан балалар китапханәсендә әфганчылар Фоат Йосыпов һәм Василий Александров белән бик җылы очрашу уздырылды. Анда 4нче мәктәп укучылары катнашты.
Малайлар-кызлар канлы бәрелешләрдә булган батырларның чыгышларын игътибар белән тыңладылар. Халык безнең солдатларны ничек кабул итте, анда табигать нинди, хезмәт бурычын үтәү куркыныч булдымы кебек сораулар да бирделәр.
Укучылар әлеге очрашудан бик бай мәгълүмат алдылар һәм бәйгедә катнашырлар дип уйлыйбыз. Ә районда иншаларга йомгак 5 февральдә ясала. Җиңүчеләр тантаналы төстә бүләкләнәчәк. Аларның эшләре Казанга җибәрелә.