Әгерҗе егете уйный торган Россия җыелма командасы Канадада икенче җиңүен яулады
Бу көннәрдә Канадада хоккей буенча Дөнья Кубогы ярышлары бара.
(Әгерҗе, 11 декабрь, “Татар-информ“, "Әгерҗе хәбәрләре", Миләүшә Ягъфәрова). Бу көннәрдә Канадада хоккей буенча Дөнья Кубогы ярышлары бара. Әгерҗе егете уйный торган Россия җыелма командасы Канадада икенче җиңүен яулады. Бу турыда район басмасы хәбәр итә.
Россия яшүсмерләр җыелма командасы составында Әгерҗе егете, хоккейчы Максим Грошев та катнаша. Максим – командада Татарстаннан сайлап алынган бердәнбер спортчы.
Беренче уенда россиялеләр Канада (Көнчыгыш) спортчыларын 3:5 белән җиңүгә ирештеләр. Бүген төнлә Россия командасына Чехиядән килгән яшьтәшләре белән очрашырга туры килде. Әлеге уенда да Россия хоккейчылары сынатмады, 4:2 исәбе белән җиңү яулады.