Дин 4 август 2020 16:19

Гарәп Әмирлекләрендә мәчеткә намазга керергә рөхсәт ителгән кешеләр санын арттырдылар

1 июльдән Берләшкән Гарәп Әмирлекләре мәчетләренә намаз укырга кертә башлаганнар иде.

Скопировать ссылку

(Казан, 4 август, «Татар-информ»). 3 августтан башлап Берләшкән Гарәп Әмирлекләрендә мәчетләргә мәйданнарның яртысына сыярлык кеше кертәләр. Бу хакта Россия Мөфтиләр шурасы сайтында хәбәр ителә.

1 июльдә коронавирус буенча карантин бетерелгәннән соң, Берләшкән Гарәп Әмирлекләрендә мәчетнең 30 процент мәйданына сыярлык кеше кертә башлаганнар иде. Ул вакытта намаз укучылар арасында дистанция саклау 3 метр итеп билгеләнгән булса, хәзер ул ике метрга калдырылган.

Азан әйтү, намазга чакыру вакыты арасы 10 минутка кадәр арттырылачак, бары кичен азан әйтелгәннән соң намаз, элеккечә, 5 минуттан соң башланачак.

Иминлек чаралары элеккечә үк үтәләчәк — мәчетләрдә битлек киеп йөрү, өйдән үз намазлыгыңны һәм Коръән нөсхәләре алып килү шарт.

12 яшькә кадәргеләр һәм 60 яшьтән өлкәнрәкләргә әлегә мәчеткә йөрү рөхсәт ителми.

#Берләшкән Гарәп Әмирлекләре

Сәхифәләр

Гарәп Әмирлекләрендә мәчеткә намазга керергә рөхсәт ителгән кешеләр санын арттырдылар