Равил Гайнетдин Сириядә һәм Төркиядә җир тетрәүдә кешеләр үлеменә бәйле кайгы уртаклашты

Мөфти Шәех Равил Гайнетдин Сирия һәм Төркиядә көчле җир тетрәү аркасында кешеләр һәлак булуга бәйле кайгы уртаклашты. Бу хакта Россия Мөфтиләр шурасы сайтында хәбәр ителә.

«Россия мөселманнары Диния нәзарәте, Россия Мөфтиләр шурасы, Россиянең 25 миллионлы мөселман өммәте һәм шәхсән үз исемемнән, коточкыч стихиядә кешеләрнең үлеме сәбәпле Төркия һәм Сирия җитәкчелегенең, зыян күргән территориядә яшәүчеләрнең тирән кайгысын уртаклашам. Россия мөселманнары көчле җир тетрәү аркасында туганнарын һәм якыннарын югалткан кешеләрнең кайгысын уртаклаша, һәлак булганнар өчен кайгыра», диелгән хәбәрдә.