Гүзәл Сәгыйтова Театр елында Казанда Музыкаль театр ачылуына өметләнә
Тинчурин театрына “музыкаль” исемен генә өстәсәк, тулы канлы музыкаль театр булмаячак, ди Кариев театры директоры.
(Казан, 22 гыйнвар, «Татар-информ», Рузилә Мөхәммәтова). Кариев театры директоры Гүзәл Сәгыйтова Театр елының яңалыгы буларак, республикада Музыкаль театр ачылачагына өметләнә. Бу хактагы фикерләре белән ул «Татар-информ»да Театр елына багышлап оештырылган түгәрәк өстәл утырышында бүлеште.
“Ләкин ул ниндидер бер театр бәрабәренә төзелмәсен иде. Алай булса, ул исем өчен генә булыр кебек. Тинчурин театрына “музыкаль” исемен генә өстәсәк, тулы канлы музыкаль театр булмаячак, коллективта низаглар да килеп чыгарга мөмкин”, - ди Гүзәл Сәгыйтова.
Тинчурин театры директоры Фәнис Мөсәгыйтов командировкада булу сәбәпле очрашуда катнашмады, театрның баш администраторы Зөлфия Бәшәрова бу темага ачыклык кертә алмады. Ул театрның репертуарында музыкаль спектакльләр булуын, “Башмагым” музыкаль комедиясе куела башлавы турында хәбәр итте.
- Тинчурин театры эчендә музыкаль труппа булдыру турында моннан дүрт ел элек үк хөкүмәт карары булуы һәм театрга шушы максатларда 17 штат берәмлеге бирелүе хакында “Татар-информ” язган иде.