Мәдәният 2 март 2017 14:09

Г.Камал театры сәхнәсендә премьера - "Ак калфагым төшердем кулдан..." спектакле

7, 8 апрель көннәрендә Г. Камал исемендәге театр 111 нче сезонның төп премьерасы – «АК калфагым төшердем кулдан» спектаклен тәкъдим итә.

Скопировать ссылку

(Казан, 2 март, «Татар-информ», Мөршидә Кыямова) 7, 8 һәм 20 апрельдә Г.Камал исемендәге театр 111 нче сезонның төп премьерасы – татар поэзиясе һәм драматургиясе классигы Илдар Юзеев пьесасы буенча "Ак калфагым төшердем кулдан..." спектаклен тәкъдим итә. Бу хакта театрның матбугат үзәге хәбәр итә.

"Ак калфагым төшердем кулдан..." спектакленең режиссеры – Фәрит Бикчәнтәев, рәссамы – Сергей Скоморохов, музыкаль бизәлешен Фуат Әбүбәкеров башкарган.

"Әлеге спектакль - 80нче еллар темасына фантазия. Сюжет, шул чорда телевидениедә бик популяр булган, монда яшәүче һәм эмиграциядәге татарлар арасында оештырылган телекүпергә нигезләнеп корылган. “Чынбарлыкта, әлбәттә, мондый нәрсәләр булмаган, - дип сөйли спектакльнең режиссеры Фәрит Бикчәнтәев. – Спектакль - мәңгелек тыюлар һәм чикләүләр, төрле фобияләр тарихы. Теге яктан да, шулай ук, безнең яктан да. Моннан тыш, пьесада милли тәңгәллек темасы да күтәрелә. Нәрсә ул миллилек? Миллилекнең табигате нидән гыйбарәт? Спектакльдә нәкъ менә шушы сорауларга җавап эзләнәчәк".

Спектакльдә театрның әйдәп баручы актерлары: Россиянең һәм Татарстанның халык артистлары Әзһәр Шакиров, Ринат Таҗетдинов, Алсу Гайнуллина, Россиянең атказанган һәм Татарстанның халык артистлары Наил Дунаев, Илдус Әхмәтҗанов, Айдар Хафизов, Рузия Мотыйгуллина, Татарстанның халык артистлары Әсхәт Хисмәтов, Искәндәр Хәйруллин, Люция Хәмитова, Раушания Юкачева, Илдус Габдрахманов, Венера Шакирова, Татарстанның атказанган артисты Мәрьям Йосыпова һәм театрның яшь артисткасы Алинә Мөдәрисова катнаша.

Чирек гасыр элек, үзгәртеп коруның кызган чагында язылган әлеге пьеса Камал театрының баш режиссерын нәрсәсе белән җәлеп итте икән? АКШ, Европа һәм ТАССР татарлары арасында оештырылган телекүпер турындагы әсәр нигә нәкъ менә бүгенге көндә бик актуаль? Тамашачылар спектакльдә нинди роль башкарачак? Әлеге сорауларга җаваплар премьера көнендә табылачак. Боларның барысы да спектакльнең премьерасында - 7, 8 һәм 20 апрельдә Г.Камал исемендәге Татар дәүләт Академия театрының Зур сәхнәсендә билгеле булачак.

#Г. Камал театры #"Ак калфагым төшердем кулдан"..

Сәхифәләр

Г.Камал театры сәхнәсендә премьера - "Ак калфагым төшердем кулдан..." спектакле