Хәвеф-хәтәр 23 февраль 2010 00:26

Февральның 21 көнендә 20 кешенең гомере республика юлларындагы һәлакәтләрдә өзелгән

21 февральда Яшел Үзән, Зәй районнарында булган транспорт бәлән бәйле шундый һәлакәтләрнең корбаннары бар

Скопировать ссылку

(Казан, 22 февраль, “Татар-информ”). 21 февраль иртәнге 9.25 сәгатьтә Зәй – Түбән Биш авылы юлының 2 нче чакрымында “ВАЗ-2110” автомобиле рулендәге 1986 елгы зат, алдан чыгарылган нәтиҗә буенча, хәрәкәт куркынычсызлыгын тәэмин итәрлек тизлекне арттырган һәм юлларда метеорологик халәтне исәпкә алмаган, нәтиҗәдә, машина идарәсен югалткан һәм, каршы як хәрәкәт юлына чыгып, “УАЗ-31519”га бәрелгән. Машиналарның беренчесе белән идарә иткән кеше Зәй шәһәре район үзәк хастаханәсендә имгәнү-җәрәхәтләнүләреннән җан биргән, икенче машинаның 1957 елгы пассажиры да әлеге хастаханәгә китерелгән, ә шушы “УАЗ-31519” белән идарә иткән 1968 елгы кеше турында республика ЮХИДИ идарәсе хәбәрендә мәгълүмат бирелмәгән.

Кичә 14.05 сәгатьтә Мәскәү – Уфа юлының 754 нче чакрымында, Яшел Үзән районы турысында, “Рено Логан” белән идарә иткән 1949 елгы зат, алдан чыгарылган нәтиҗә буенча, уң як юл кырыеннан борылып киткәндә шушы ук юнәлештә 1966 елгы кеше идарәсендә барган “ДАФ ФТ” йөк машинасына юл бирмәгән. Йөк машинасы да, фаразлар буенча, юл хәрәкәте кагыйдәләрен бозып, тизлекне хәрәкәт иминлеген тәэмин итәрлек сайлый алмаган. Машиналар бәрелешүдән “Рено” рулендәге һәм аның пассажирлары булган 1940, 1950 елгы хатын-кызлар һәлакәт урынында җан биргән.

Февральның 21 көнендә 20 кешенең гомере республика юлларындагы һәлакәтләрдә өзелгән, 316сы имгәнгән, җәрәхәтләнгән. Кешеләргә бәла-каза китергән транспорт һәлакәтләре Татарстан территориясендә соңгы 3 атна эчендә 255кә җиткән.

Сәхифәләр

Февральның 21 көнендә 20 кешенең гомере республика юлларындагы һәлакәтләрдә өзелгән