Уха фестивале, гигант итекләр, коймак: кышкы «Күрше» фестивале нәрсә белән шаккатырачак

Татарстанда «Күрше» фестиваленең кышкы сезоны башлана: республиканың төрле почмакларыннан 49 проектка ишегалларын һәм паркларны кышкы могҗизалар киңлегенә әверелдерү өчен 1 миллион сумга кадәр грантлар бирелде. Сүзебез – җиңүчеләрнең нинди идеяләрне тормышка ашырачагы һәм фестиваль кунакларына нәрсәләр тәкъдим ителәчәге турында.

Фестиваль нәрсә турында?

«Күрше» ишегалды вакыйгалары фестивале – Татарстан Рәисе Рөстәм Миңнеханов инициативасы белән 2025 елның язында старт алган масштаблы грант конкурсы. Проект «Безнең ишегалды» программасының дәвамы булып тора.

Аның төп максаты – күршеләр белән дус-тату яшәү традициясен үстерү, гаилә кыйммәтләрен ныгыту һәм ишегалларын кешеләр бер-берсен белә, бергәләп ял итә һәм уңайлыклар тудыра торган урынга әверелдерү.

Кышкы сезон җәйге фестиваль зур уңыш казанганнан соң барлыкка килде, ул бу идеягә ихтыяҗ зур булуын күрсәтте: ул чагында 585 гариза тапшырылган, җиңүчеләр республика буенча 291 чара үткәргән.

Җәйге һәм кышкы сезонда үзмәшгуль гражданнар, идарәче компанияләр, коммерцияле булмаган оешмалар һәм муниципаль бюджет учреждениеләре катнашкан.

Хәзерге кышкы этапка рекордлы санда (1448) гариза килгән – бу җәйгесенә караганда өч тапкыр күбрәк. Приз фондын ике тапкыр – 40 миллион сумга кадәр арттырырга карар кылганнар.

Оештыручылар кышкы чорда җылы атмосферага басым ясаган. Сметага кышкы декор һәм яктырту чыгымнарын кертергә рөхсәт иткәннәр, бу исә бәйрәмнәрдән соң да халыкны сөендереп торачак.

«Күрше» – игелек һәм могҗизалар юлы»

Нәтиҗәдә, кышкы бәйрәмнәрне уздыру өчен финанс чаралары белән тәэмин ителгән 49 проект сайлап алынды.

Татарстан Республикасы Премьер-министры урынбасары Ләйлә Фазлыева бүләкләү тантанасында фестивальне Яңа ел алдыннан игелек юлы һәм тылсым институты дип атады.

«Без балаларыбызны әйләнә-тирә дөньяга, янәшәбездәге кешеләргә сакчыл карарга өйрәтергә тырышабыз. Төрле аудиторияләр белән аңлаешлы телдә сөйләшкәндә «тигезлек» принцибын кулланабыз. «Күрше» фестивале – нәкъ менә шул игелек юлы», – дип билгеләп үтте вице-премьер.

Ул идеяләрне олылар гына түгел, үз ишегалларына яңалык кертергә теләгән балалар да уйлап табуын искәртте.

Бәйгедә махсус хәрби операция ветераннары да катнашкан. Фазлыева сүзләренчә, алар «янәшәдәге кешеләрнең ярдәмен һәм көчен барысыннан да яхшырак белә».

«Чарада традицион кыйммәтләрне исәпкә алу таләбе куелган иде. Бу – гаилә һәм балалар, бу – туган илгә һәм кече Ватанга мәхәббәт», – диде Фазлыева.

Рекордлы кайтавазлар һәм арттырылган грантлар

Татарстан Шәһәрләрне үстерү институты директоры Наилә Зиннәтуллина республика халкының конкурска карата булган зур кызыксынуын билгеләп үтте.

«Безнең грант күләмен 500 меңнән 1 миллион сумга кадәр арттыра алуыбыз бик шәп. Кышкы чорда (барысына да кайнар чәй кирәк, иртә караңгы төшә, өстәмә яктырту һәм җылылык таләп ителә) чараларны ачык һавада үткәрү – үзе бер сынау. Моңа батырчылык иткәнегез өчен рәхмәт», – дип мөрәҗәгать итте Зиннәтуллина җиңүчеләргә.

Ул бюджет оешмаларының актив катнашуы сезонның яңалыгы булуын, ә һәр гаризаның җентекле сценарий һәм финанс планын үз эченә алуын билгеләп үтте.

«Гаризаларның сыйфаты бик югары, киләсе айларны чын мәгънәсендә җылыта һәм меңләгән кешене берләштерә торган бик күп кышкы кызыклы форматлар барлыкка килде», – дип өстәде ул.

Җиңүчеләр нинди бәйрәм оештырырга ниятли

Барлык җиңүчеләр 20 декабрьдән 11 гыйнварга, 20 гыйнвардан 10 февральгә һәм 11 февральдән 28 февральгә кадәр кыш дәвамында ким дигәндә өч вакыйга үткәрәчәк.

Грант алучылар «Татар-информ» агентлыгына үз проектлары турында сөйләде.

«Нурлат йолдызлыгы» коммерцияле булмаган автоном оешмасы директоры Резеда Гиняева конкурста кабат җиңүе турында шатланып хәбәр итте. «Без инде җәй көне җиңдек һәм хәзер яңадан катнашабыз!» - диде ул.

Гиняева хәбәр иткәнчә, аларның «Күршеләр – иң бердәм кешеләр» дип аталган яңа проекты патриотик характерга ия. Команда өч зур вакыйга планлаштырган, Нурлатның Журналистлар скверындагы бәйрәм аларның иң югары ноктасы булачак, анда иң актив күршеләрне бүләкләячәкләр. «Җырлап-биеп күңел ачарга ниятлибез, хәтта коймак та пешерәчәкбез!» - дип вәгъдә итте ул.

Минзәләдән Ирина Михайлова фестивальдә «Уха фестивале» проектын тәкъдим итәчәк, аны команда инде биш ел үткәрә. Аның сүзләренчә, «Күрше» гранты популяр чараны яңа дәрәҗәгә күтәрергә мөмкинлек бирәчәк.

«Бу безнең иң матур яр буендагы бер көнлек марафон булачак», - диде ул.

Программа бик бай булыр дип көтелә: ул балык тоту буенча ярышлар, мастер-класслар һәм, әлбәттә, үзең тоткан балыктан уха пешерүне үз эченә ала.

Лениногорск педагогы Татьяна Семенова «Күрше» фестивалендә беренче тапкыр катнашуын билгеләп үтте, чөнки муниципаль учреждениеләр өчен мондый мөмкинлек кышкы сезонда гына барлыкка килде.

Аларның «Гаилә традицияләре җылысы» дип аталган проекты биш чараны берләштерә. Мәсәлән, 27 декабрьдә кар һәм палаткалардан гыйбарәт «Киләчәк архитектурасы» шәһәрчекләрен төзү планлаштырыла, ә февральдә «Юбилейный» паркында гаилә иҗат фестивале үткәрергә ниятлиләр, анда һәр гаилә үз талантын күрсәтә алачак.

Теләче районы Балалар иҗаты үзәге җитәкчесе Зилә Баева аңлатканча, аның «Кыш «операциясе» проекты идеясе тууга совет комедияләрен яратуы сәбәпче булган.

Ул Теләче авылында гаилә квестлары, мастер-класслар һәм тәм-томнарны үз эченә алган күңел ачу чарасы планлаштырылуын әйтте, ул өч көн дәвам итәчәк. Аның сүзләренчә, гигант киез итек һәм көянтә белән ярышу аеруча кызыклы булачак. «Барысы да була: гаилә квест-уеннары һәм мастер-класслар да, бөтен кунаклар өчен кайнар чәй һәм коймаклар да», – дип сүзен төгәлләде ул.

Алда – тавыш бирү

Җиңүчеләрнең төп исемлегенә кермәгән, әмма жюри тарафыннан югары бәяләнгән 12 проектның тагын бер шансы бар. 12 декабрьгә кадәр «Күрше» фестиваленең телеграм-каналында халык катнашында тавыш бирү үткәрелә. Иң күп тавыш җыйган өч команда шулай ук финанс ярдәме алачак. Булачак кышкы бәйрәмнәрнең барлык анонсларын куршефест.рф сайтында табарга мөмкин.

«Татар-информ», Чулпан Шакирова