Фәрит Мөхәммәтшин: Яшь гаиләләр Татарстанның терәге булырга тиеш
Татарстан Республикасы Яшьләр эшләре министрлыгының аерым игътибары яшь гаиләләргә ярдәм итүгә бирелергә тиеш. Алар республикадан китәргә теләмәсен, монда яшәвен һәм үсүен дәвам итәрлек шартлар тудырырга кирәк. Бу хакта ведомствоның йомгаклау коллегиясендә ТР Дәүләт Советы Рәисе Фәрит Мөхәммәтшин белдерде.
«Яшь гаилә Татарстанның терәге булырга тиеш. Яшь гаиләләргә шәхесара социаль, карьера һәм белем бирү ярдәмен интеграцияләү зарур. Сыйфатлы ведомствоара хезмәттәшлекне тәэмин итәргә кирәк», - дигән бурыч куйды парламент җитәкчесе.
Аның сүзләренчә, илдә демография мәсьәләсе иң югары дәрәҗәдә күтәрелә. Соңгы өч елда республика халкының гомуми санында яшьләрнең өлеше 28 проценттан 25 процентка кадәр кимүе дә борчу тудыра.
Яшь гаиләләргә ярдәм итү бурычы инде беренче ел гына өстенлекле юнәлешләрнең берсе буларак билгеләнми. Соңгы елларда яшь гаиләләр белән эшләүнең яңа механизмнары булды, әмма адреслы эшне көчәйтергә һәм гаилә юнәлешен финанслауга якын килүне яңадан карарга кирәк, дип өстәде ТР Яшьләр эшләре министры Азат Кадыйров.
«Торак мәсьәләсе гаилә коруга һәм балалар тудыруга комачаулый торган төп факторга әверелә. Татарстанда, тулаем илдәге кебек үк, торак алу мөмкинлеге булмау борчу тудыра», - дип ассызыклады ул.
Республикада яшьләргә һәм яшь гаиләләргә дәүләт ярдәме күрсәтүнең дүрт механизмы булдырылды һәм гамәлдә. 2025 елда Татарстан Рәисе карары белән Фәннәр Академиясе белән берлектә торак шартларын яхшырту өчен яшь галимнәргә грант ярдәме күрсәтү проекты старт алды.
2026 елның бурычы торак мәсьәләләрен хәл итү буенча яңа тәкъдимнәр эшләү һәм Ислам ипотекасы механизмнарын кертү, дип йомгаклады министр.