Сәхифәләр
«Татар-информ» мәгълүмат агентлыгы баш редакторы
Ринат Билалов
420066, Татарстан Республикасы, Казан, Декабристлар ур., 2нче йорт.
«ТАТМЕДИА» акционерлык җәмгыяте
«Татар-информ» мәгълүмат агентлыгы татар редакциясе
Баш редактор
Рәмис Латыйпов
Баш редактор урынбасары
Ләйсән Хафизова
Фәрит Мөхәммәтшин мигрантларны Татарстан мәдәнияте белән таныштырырга кирәк дип белдерде
![Фәрит Мөхәммәтшин мигрантларны Татарстан мәдәнияте белән таныштырырга кирәк дип белдерде](https://tatar-inform.tatar/resize/shd/images/uploads/news/2023/7/13/89507d74036e29a9dbd487be29d24b1d.jpg)
Татарстанга килүче мигрантларны республика мәдәнияте, анда яшәүче халыкларның традицияләре һәм йолалары белән таныштырырга кирәк. ТР Дәүләт Советы Рәисе Фәрит Мөхәммәтшин республиканың Халыклар дуслыгы йортында узган түгәрәк өстәлдә шулай дип белдерде. Бу хакта республика парламентының матбугат хезмәте хәбәр итә.
«Татарстан эш һәм яшәү ягыннан караганда мигрантларны җәлеп итә торган төбәк булып кала. Республикага килүче чит ил гражданнарының күпчелеге Казанда туктала, калганнары яшәү һәм акча эшләү өчен Чаллы, Әлмәт һәм Алабуга кебек шәһәрләрне сайлый. Безнең бурыч – миграция агымын анализлау, республикага килүчеләрнең Татарстанга ничек җайлашуын, нәрсә белән шөгыльләнүен ачыклау. Дөньядагы вазгыять этникара һәм конфессияара мәсьәләләрне даими контрольдә тотарга мәҗбүр итә», - дип искәртте сәясәтче кереш чыгышында.
Мөхәммәтшин Татарстан халыклары Ассамблеясы эшенә аерым тукталды, аның эшчәнлеге шул исәптән милли-мәдәни автономияләрне берләштерүгә дә юнәлдерелгән. Ул республикада үткәрелә торган зур этномәдәни чараларда актив катнашканнары өчен аларның җитәкчеләре һәм активистларына рәхмәт белдерде.
«Бу бәйрәмнәр безнең халыкларны берләштерә, мәдәният, традицияләр һәм йолалар белән таныштыра, бу – фундаменталь кыйммәтләр. Безнең бурыч – республика тыныч яшәсен өчен Татарстанга килүче мигрантларда күпмилләтле халкыбызның бай мәдәниятенә карата хөрмәт уяту һәм аның белән таныштыру», - дип билгеләп үтте ТР Дәүләт Советы Рәисе.
Мөхәммәтшин шулай ук милли-мәдәни автономия башлыкларына төбәккә килүче ватандашлар белән эшне көчәйтергә, аларны очрашулар һәм чараларга чакырырга кушты. Шуңа бәйле рәвештә, ул 2023 елның Татарстан Рәисе Рөстәм Миңнеханов тарафыннан республикада Милли мәдәниятләр һәм гореф-гадәтләр елы дип игълан ителүен искәртте.
Кызыклы яңалыкларны күзәтеп бару өчен Телеграм-каналга язылыгыз