Фәрит Мөхәммәтшин: Әтнә районы Сабан туена күрше Марий Элдан да халык күп килә
Бүген Әтнә районының Каенсар урманы янында районкүләм Сабантуй үтә. Милли бәйрәмдә «Татар-информ» хәбәрчесе дә эшли. Халыкны бәйрәм уңаеннан котлап, Татарстан Дәүләт Советы Рәисе Фәрит Мөхәммәтшин Әтнә Сабан туеның чын-чынлап милләтләр дуслыгын исбат итүен әйтте.
«Беләсезме, мин уйлавымча, чиста татар авылларында Сабантуй традицияләре саклана, буыннан-буынга күчә. Нәкъ Әтнәдәгечә. Халкыбыз Сабантуйларны көтеп ала, бу бәйрәм — очрашулар, хезмәтне данлау, күңелле уеннар урыны. Әтнә Сабан туена күрше Марий Элдан да халык күп килә», – диде Фәрит Мөхәммәтшин журналистларга.
Шулай ук ул Әтнә районының авыл хуҗалыгы һәм икътисад тармагы буенча алдынгылар сафында булуын билгеләде. «Республикада интеграл күрсәткечләр буенча Әтнә районы 5 урында булса, терлекчелек нәтиҗәләре нигезендә 1 урында бара», – дип искәртте ул.
Фәрит Мөхәммәтшин Әтнә районы халкына дәүләт бүләкләре тапшырды һәм ат чабышларын тамаша кылды.
