Фәрит Габделганиев: Түбән Камада бизнес өчен күп эшләр башкарыла

Татарстан Республикасы Рәисе каршындагы эшмәкәрләр хокукларын яклау буенча вәкаләтле вәкил Фәрит Габделганиев эшлекле сәфәр кысаларында Түбән Кама районының җитештерү мәйданчыкларында булды һәм эшмәкәрләр белән «Мөһим нәрсәләр турында сөйләшүләр: бизнес һәм хакимият» пленар сессиясен уздырды. Очрашуда Түбән Кама муниципаль районы башлыгы, шәһәр мэры Радмир Беляев катнашты.

Фәрит Габделганиев «Кама аръягы индустриаль паркы» җитештерү-склад базасы территориясендә күптән түгел ачылган Wildberries компаниясе складында, шулай ук «Түбән Кама» сәнәгать паркы резидентлары мәйданчыкларында — «ПЛАСТДЕЛО», «Метакам», «Бакелит», «СОВИТАЛ» предприятиеләрендә булды. Предприятие җитәкчеләре үсеш планнары белән уртаклаштылар һәм бизнесны киңәйтү өчен хәл ителәсе мәсьәләләр турында сөйләделәр.

Пленар сессияне ачып, Татарстан Республикасы бизнес-омбудсмены Түбән Кама Россиянең иң эре сәнәгать үзәкләренең берсе булуын билгеләп үтте. Монда кече һәм урта бизнесны үстерүгә зур игътибар бирелә. «Беренче Эшмәкәр йорты Казанда, ә икенчесе нәкъ менә Түбән Камада барлыкка килде. Бу эшмәкәрлек бергәлегенә игътибар күрсәткече», - дип билгеләп үтте Фәрит Габделганиев.

Ул эшмәкәрләрнең хокукларын яклау институты эшчәнлеге турында сөйләп узды. Төп нәтиҗә: 2020 елда контроль-күзәтчелек органнары гамәлләренә карата шикаятьләр барлык мөрәҗәгатьләрнең 42 процентын тәшкил итсә, 2025 елда мондый бер генә шикаять тә кермәгән.

«Беренче чиратта бу Татарстан Республикасы Рәисе Рөстәм Миңнехановның көндәлек системалы эше нәтиҗәсе. Татарстанда эшләп килүче барлык контроль-күзәтчелек органнары эше хәзер бизнеска административ басымны киметүгә юнәлдерелгән, моның артыннан ТР Прокуратурасы җентекләп күзәтә», - дип ассызыклады Фәрит Габделганиев.

Татарстан Республикасы бизнес-омбудсмены салым йөкләнеше турындагы сорауга җавап биреп, Татарстан 2022 елда салым салуның автоматлаштырылган гадиләштерелгән системасын (АУСН) куллана башлаган беренче пилот төбәк булуын билгеләп үтте. Нәкъ менә шушы режимда елына 60 млн сум чиге сакланган, аннан түбәнрәк өстәмә бәя өчен салым (НДС) түләнми.

«ТР Рәисе Рөстәм Миңнехановның карары нәтиҗәсендә 2026 ел башында дистәләгән мең Татарстан эшмәкәре салым салуның автоматлаштырылган гадиләштерелгән системасына тиз күчә алды. Аларга НДС түләү бусагасын 20 млн сумга кадәр кыскарту берничек тә тәэсир итмәде. Моны шулай ук бизнеска ярдәм чарасы буларак карарга мөмкин», — дип ассызыклады бизнес-омбудсмен.

Шәһәрдәге бер кафе хуҗасы финанс кыенлыклары кичерә торган җәмәгать туклануы предприятиеләренә ярдәм чараларын эшләүне сорады. Түбән Кама мэры проблеманың системалы характерда булуын раслады. Фәрит Габделганиев эшмәкәрдән конкрет саннар һәм тәкъдимнәр белән мөрәҗәгать әзерләүне сорады, ул Татарстан Республикасы икътисадының тотрыклы үсешен тәэмин итү буенча оператив штабта каралачак.

«Республиканың конкрет тармакларда системалы мәсьәләләрне оператив хәл итү тәҗрибәсе бар. Мәсәлән, Татарстан Республикасы Рәисе ярдәме белән без җиңел сәнәгать товарларын маркировкалау срокларын федераль дәрәҗәдә озайтуга ирештек. Хәзер бу тема юкка чыкты диярлек», - дип искәртте ул.

Кайбер эшмәкәрләр ихтыяҗ кимүгә зарланган. Радмир Беляев бу сорауга җавап биреп, Түбән Кама предприятиеләре продукциясенә республикада да, аннан читтә дә ихтыяҗ зур булуын әйтте. «Планнарыгыз турында сөйләргә оялмагыз. Без Түбән Кама бизнесы продукциясен барлык мөмкин булган каналлар буенча этәрергә әзер», - дип белдерде мэр һәм Түбән Кама товарлары тәкъдим ителәчәк даими эшләүче күргәзмә оештырырга тәкъдим итте.

Шулай ук квалификацияле кадрлар җитмәү мәсьәләсе дә күтәрелде, бу җитештерү объектларын киңәйтүне кыенлаштыра. «Карар комплекслы якын килүне таләп итә – башка төбәкләрдән килгән белгечләргә фатирлар бирүдән алып яшьләрне урында укытуга кадәр. Компанияләргә Түбән Кама көллиятләре белән тыгызрак хезмәттәшлек итәргә, кирәкле юнәлешләр буенча кафедралар оештырырга, җиһазлар һәм укытучылар белән тәэмин итүдә ярдәм итәргә тәкъдим итәм», — дип мөрәҗәгать итте мэр эшмәкәрләргә.

Очрашуны тәмамлап, Радмир Беляев эшмәкәрләргә диалог өчен рәхмәт белдерде, сорауларның югары сыйфатлы булуын һәм алар буенча фикер алышуда активлык күрсәтүләрен билгеләп үтте.

«Без диалог өчен һәрвакыт ачык. Сезнең сорауларыгыз, энергиягез һәм үсеш теләгегез — район һәм бөтен республика икътисадын алга этәрүче төп ресурс», — дип йомгаклады Фәрит Габделганиев.