Фәрит Мөхәммәтшин яшь сәясәтчеләрне укыту буенча «ПолитЗавод» проекты эксперты була
Проект «Бердәм Россия яшь гвардиясе»нең Татарстан бүлеге тарафыннан гамәлгә ашырыла, ул 18 яшьтән 35 яшькә кадәрге катнашучыларга исәпләнгән.
(Казан, 30 гыйнвар, «Татар-информ»). Татарстанда «ПолитЗавод» республика иҗтимагый-сәяси проектында катнашу өчен гаризалар кабул ителә башлады. Анда экспертларның берсе булып ТР Дәүләт Советы Рәисе, «Бердәм Россия»нең Татарстан бүлеге секретаре Фәрит Мөхәммәтшин чыгыш ясаячак. Бу хакта «Татар-информ»га «Бердәм Россия» Бөтенроссия сәяси партиясенең Татарстан төбәк бүлеге мәгълүмат үзәге җитәкчесе Наталья Лукина хәбәр итте.
«Фәрит Мөхәммәтшин проектта экспертларның берсе буларак катнашырга планлаштыра. Аңа проект ошый, ул һәрвакыт очрашуларга һәм белем бирү сессияләренә бик теләп килә», — диде Лукина. Ул искәрткәнчә, проектка ел саен 1 меңгә якын гариза килә, сайлап алудан уртача 100 кеше уза.
«ПолитЗавод» иҗтимагый-сәяси тормышка алга таба этәрү өчен сәяси актив яшьләрне ачык конкурс нигезендә сайлап алу мәйданыннан гыйбарәт. Проект «Бердәм Россия яшь гвардиясе»нең Татарстан бүлеге тарафыннан гамәлгә ашырыла, ул 18 яшьтән 35 яшькә кадәрге катнашучыларга исәпләнгән.
Проект кысаларында әйдәп баручы сәясәтчеләр, депутатлар һәм җәмәгать эшлеклеләреннән лекцияләр планлаштырылган. Проект дәвамында «ПолитКөрәш» яшьләр ток-шоуы узачак. Яңа проектның яңа сезон үзенчәлеге булып, өч белем бирү модуле торачак.
«Яшь кандидатлар» — Татарстанның муниципаль сайлауларында катнашырга теләгән кешеләр өчен, «Иҗтимагый лидерлар» модуле республиканың иҗтимагый-сәяси тормышына кушылырга теләүчеләргә һәм Татарстан яшьләренең хокукларына һәм законлы мәнфәгатьләренә кагылышлы проблемаларны закон нигезендә хәл итүдә катнашырга теләгән кешеләр өчен «Закон чыгаручы яшьләр» модуле каралган.