Фәрит Мөхәммәтшин Яңа Чишмә районында локаль сугышта катнашучылар истәлегенә чәчәк салды
Татарстан Парламент җитәкчесе Әфганстаннан совет гаскәрләрен чыгаруга 30 ел уңаеннан оештырылган митингта катнашты.
(Казан, 15 февраль, «Татар-информ»). Бүген Татарстан Яңа Чишмә районында республика Дәүләт Советы Рәисе Фәрит Мөхәммәтшин локаль сугышта катнашучылар истәлегенә чәчәк салды. Бу турыда республика Парламенты матбугат хезмәте хәбәр итә.
Татарстан Дәүләт Советы Рәисе Фәрит Мөхәммәтшин Яңа Чишмә районында эш сәфәрендә булды. Анда Әфганстаннан совет гаскәрләрен чыгаруга 30 ел тулуга багышланган митингта катнашты. Ул районда яшәүчеләр белән бергә сугыш кырыннан кайтмаган солдатларны искә алды.
«Бүген бөтен ил шул еллар вакыйгаларын, һәлак булганнарны искә ала. Безнең бурыч – яшь буынга зур бурычын үтәгән, батырлык күрсәткән солдатлар турындагы истәлекләрне җиткерү. Иң мөһиме –хәзер бик үк тыныч булмаган дөньяды яңа корбаннар булдырмау өчен кулдан килгәннең барысын да эшләргә кирәк», – диде Фәрит Мөхәммәтшин митингта.
Әфганстан территориясендә хәрби хәрәкәтләрдә Яңа Чишмә районыннан 43 кеше катнашкан. Аларның бишесе һәлак булган.
