Фәрит Мөхәммәтшин Сәкинә Шәймиева вафаты уңаеннан Минтимер Шәймиевнең кайгысын уртаклашты
"Иң якын һәм кадерле кешегез вафат булуы – тирән хәсрәт, зур югалту", - диелә ТР парламенты җитәкчесе кайгынамәсендә.
Скопировать ссылку
(Казан, 16 ноябрь, "Татар-информ"). ТР Дәүләт Советы Рәисе Фәрит Мөхәммәтшин бүген Сәкинә Шәймиева вафат булу уңаеннан, республиканың Дәүләт киңәшчесе Минтимер Шәймиевнең кайгысын уртаклашты, дип хәбәр итә Дәүләт Советы матбугат хезмәте.
"Сезнең иң якын һәм кадерле кешегез, тугры дустыгыз һәм фикердәшегез булган Сәкинә Шакир кызының вафат булуы – тирән хәсрәт, зур югалту. Киткәннәр безнең хәтердә яши. Сәкинә Шакир кызы аны белгән һәм яраткан кешеләр күңелендә мәрхәмәтле, ярдәмчел, көчле рухлы ханым булып мәңгелеккә кала. Сезгә һәм якыннарыгызга бу кайгылы мизгелләрдә сабырлык телим", - диелә аның Минтимер Шәймиевкә юллаган телеграммасында.
- Татарстанның беренче Президенты, Дәүләт Киңәшчесе Минтимер Шәймиевнең хәләл җефете Сәкинә Шәймиева 79 яшендә, озакка сузылган авырудан соң бүген, 16 ноябрьдә вафат булды. Алар 57 ел бергә гомер иткәннәр. Мәрхүмә Казанның Яңа Татар бистәсе зиратында җирләнә.